Ғылымдағы халықаралық ынтымақтастық – қазіргі заманның басты қажеттіліктерінің бірі. Осы бағытта қазақстандық ғалымдардың әлемдік зерттеу орталықтарында тәжірибе алмасып, білімдерін жетілдіруі қашан да өзекті.

Жәнібеков университетінің ғалымы, философия докторы (PhD), қауымдастырылған профессор Перизат Абдуразова және М. Әуезов университетінің ғалымдары, философия докторы (PhD), қауымдастырылған профессор Ұлжалғас Назарбек пен Еркебұлан Райымбеков Жапонияның Фукуока қаласындағы Кюсю университетінде іссапарда болып, наноқұрылымды судың кешенді зерттеулерін жүргізу бойынша бірлескен ауқымды ғылыми зерттеу жұмыстарын атқарды.

Ғалымның зерттеу жұмысы наноқұрылымды судың жылу, электр және құрылымдық қасиеттерін кешенді зерттеуге бағытталған. Бұл бағыт қазіргі кезде су ресурстарын тиімді пайдалануда және энергия үнемдеуде ерекше өзекті. Наноқұрылымды су – бұл молекулалық деңгейде ерекше құрылымға ие су, оның физикалық және химиялық қасиеттері стандартты судан айтарлықтай өзгеше. Мұндай суды зерттеу табиғи экожүйелерді сақтау, өнеркәсіпте тиімді технологияларды енгізу және денсаулық сақтау саласында маңызды ғылыми жетістіктерге жол ашады.

Кюсю университеті – Жапонияның жетекші ғылыми орталықтарының бірі. Ол су жүйелерін зерттеудегі заманауи технологияларымен және ғылыми құрал-жабдықтарымен әлемге танымал. Іссапар барысында қазақстандық ғалым университеттің заманауи зертханаларында жұмыс істеп, су жүйелерін зерттеу үшін қолданылатын алдыңғы қатарлы әдістермен танысты. Зерттеулер барысында наноқұрылымды судың жылу өткізгіштігі, электр өткізгіштігі және құрылымдық ерекшеліктеріне талдау жүргізілді. Алынған деректер судың физикалық-химиялық қасиеттерінің молекулалық құрылымына байланысты екенін көрсетті. Бұл нәтижелер суды өнеркәсіпте қолдану тиімділігін арттырып қана қоймай, экологиялық таза технологияларды дамытуға да мүмкіндік береді.

Жапониядағы жұмыс барысында ғалымдар су жүйелерінің ерекшеліктерін түсіндіретін бірнеше жаңа заңдылықтарды анықтады. Атап айтқанда:

- наноқұрылымды судың электр өткізгіштік қасиеттерінің температураға тәуелділігі;

- су молекулаларының белгілі бір құрылымдарда қайта құралуы және бұл үдерістің жылу энергиясымен өзара байланысы;

- наноқұрылымды суды энергия сақтау құрылғыларында және экологиялық таза өндіріс салаларында пайдалану мүмкіндіктері.

Бұл нәтижелер судың табиғи және жасанды жағдайлардағы қасиеттерін зерттеуге ғана емес, су ресурстарын тиімді басқарудың жаңа тәсілдерін енгізуге де негіз бола алады.

Жапондық әріптестермен жүргізілген бірлескен жұмыс нәтижесінде ғалымдар су жүйелерін зерттеу бойынша бірнеше халықаралық мақалалар жариялауды жоспарлап отыр. Сондай-ақ, бұл зерттеулер Қазақстанда да ғылымды дамытуға және жаңа технологияларды енгізуге ықпал ететіні сөзсіз.