Жасанды интеллект – білім беру саласының жаңа мүмкіндіктерін айқындайтын маңызды технология. Осы бағытта жоғары оқу орындарында білім беру, ғылыми-зерттеу және басқару үдерістеріне заманауи ЖИ құралдарын тиімді енгізу жұмыстары жүргізілуде. Жобаны ҚР Президенті Қ.Тоқаевтың тапсырмасымен, ҚР Ғылым және жоғары білім министрлігі жанындағы комитет жүзеге асыруда.

Осыған орай, бүгін университетте Bilim Upskill жобасының AI-методологы Әбділкәрім Әбділрахманұлы профессор-оқытушылар құрамы мен қызметкерлеріне арнайы әзірленген ChatGPT Edu платформасының мүмкіндіктерін таныстырды. Қатысушылар аталған платформаның тегін нұсқадан негізгі айырмашылықтарын білді. Сонымен қатар жасанды интеллектіні тиімді қолданудың практикалық жолдарын көрді.

ЖИ құралдары тек уақыт үнемдейтін технология емес, оқытушының кәсіби мүмкіндігін кеңейтетін, шығармашылық және зерттеушілік әлеуетін арттыратын заманауи көмекші құрал. Ал, педагогтің цифрлық құзыреттілігі – сапалы білім беруге ұмтылыс. Осы ретте ОҚПУ білім беру үдерісіне озық технологияларды енгізу, педагогтер мен білім алушылардың цифрлық дағдыларын дамыту және жасанды интеллектіні жауапты әрі тиімді қолдану бағытындағы жұмыстарды жалғастырмақ.