Әскери кадрлар мен мамандардың біліктілігін арттыру курсы аясында Түркістан және Шымкент қалаларындағы жоғары оқу орындарының әскери кафедра оқытушыларына арналған дәрістер өткізілді. Арнайы дәрісті Қазақстан Республикасы Қорғаныс министрлігіне қарасты «Әскери стратегиялық зерттеу орталығы» ұйымдастырды.

Аталған курс барысында Ө. Жәнібеков атындағы Оңтүстік Қазақстан педагогикалық университеті Қазақ тілі мен әдебиеті кафедрасының қауымдастырылған профессор міндетін атқарушы, PhD доктор Ақбілек Мыңбаева дәріс оқыды. Дәрістер «Ғылыми-зерттеу жұмыстарын ұйымдастыру», «Ғылыми адалдық және зерттеу этикасы», «Ғылыми зерттеу нәтижелерін жариялау» тақырыптарын қамтыды.

Сабақ барысында ғылыми зерттеулерді жоспарлау мен ұйымдастырудың әдіснамалық негіздері, академиялық адалдық қағидаттары, зерттеу этикасын сақтау, ғылыми жарияланымдарды әзірлеу және халықаралық ғылыми дерекқорларда индекстелетін журналдарға мақала жариялау талаптары қарастырылды. Сонымен қатар әскери кафедра оқытушыларының ғылыми-зерттеу қызметін жетілдіру, зерттеушілік дағдыларын дамыту және ғылыми нәтижелердің сапасын арттыру мәселелері талқыланды.