Zhanibekov university logo

ҰЛТ ЖАНАШЫРЫ – ҰРПАҚ ЖАДЫНДА

16 Қараша 2026, 15:07
Медиа Орталық

Тарих және педагогика факультетінің ұйымдастыруымен «Ұлт жанашыры – ұрпақ жадында» атты ғылыми-танымдық семинар өткізілді. Іс-шараны факультет деканы Г. Таутаева ұйымдастырды. Семинарға «Бастауышта оқыту педагогикасы мен әдістемесі» білім беру бағдарламасының білім алушылары қатысты. Семинардың негізгі мақсаты – көрнекті қоғам қайраткері Өзбекәлі Жәнібековтің ұлттық мәдениет пен тарихты жаңғырту жолындағы өлшеусіз еңбегін дәріптеу, профессор Қ. Ергөбектің «Өзбекәлі Жәнібеков кім?» атты оқу басылымы арқылы жас ұрпақтың бойына рухани-патриоттық құндылықтарды сіңіру, білім алушылардың ғылыми-танымдық өрісін кеңейту және кітап оқуға деген қызығушылығын арттыру.

Іс-шара барысында білім алушылар «Өзбекәлі Жәнібеков кім?» оқу басылымының мазмұнына терең талдау жасап, өз пікірлері мен сын-ескертпелерін ортаға салды. Кітаптың мазмұндық ерекшеліктері, тарихи деректердің берілуі, Өзбекәлі Жәнібековтің ұлт руханияты мен мәдени мұраны сақтаудағы рөлі жан-жақты талқыланды. Семинарға филология ғылымдарының докторы, профессор, оқу басылымының авторы Қ. Ергөбек қатысып, қатысушылармен құнды ой-пікірлерімен және ғылыми көзқарастарымен бөлісті. Автордың тағылымды әңгімесі білім алушылардың тарихи тұлға туралы танымын тереңдетіп, ұлттық құндылықтарға деген құрметін арттыра түсті.

Семинар модераторы З.Қуанышбаева қатысушылардың пікір алмасуына бағыт-бағдар беріп, мазмұнды талқылаудың өтуіне ықпал етті. Тағылымы мол кездесуде білім алушылар ұлт тарихы мен руханиятының дамуына үлес қосқан тұлғалардың өмірі мен еңбегін танудың маңыздылығына көз жеткізді. Іс-шара жастардың отансүйгіштік сезімін қалыптастыруға, ұлттық мұраға құрметпен қарауға және кітап оқу мәдениетін дамытуға бағытталды.