Өзбекәлі Жәнібеков атындағы Оңтүстік Қазақстан педагогикалық университетінде «Жаңа қадам» арнау кеші өтті. Атаулы шара биыл университетке жаңадан қабылданған 1 курс студенттеріне арналды.
Думанды кешті университет Басқарма төрағасы-ректор міндетін атқарушы Гүлжан Сүгірбаева құттықтау сөзбен ашты.
— Біздің университет Оңтүстікте ең бірінші болып ашылған оқу ордасы. Сонау 1937 жылы, осыдан 87 жыл бұрын ең алғаш студенттерге есігін ашқан, екі жылдық мұғалімдер институты болған. Осыдан 42 жыл бұрын мен де осы университетке арман қуып келдім. Қазақ мақтанышына айналған қаншама тұлғалар тәрбиелеп шығарған оқу ордасы. Ендігі Мұхтар Шаханов пен Ханбибі Есенқараевалар осы сіздердің араларыңыздан шығатынына сенеміз және оған жағдай жасаймыз. Алғашқы қадамдарыңыз құтты болсын! — деп ақ жол тіледі.
Арнау кеші Жаратылыстану факультетінің 4 курс студенті Ғалижанұлы Асылжан мен Өнер және білім факультетінің 3 курс студенті Үсен Ұлшаттың орындауындағы «Жаңа қадам» әнімен басталды.