Оқушылардың жазғы демалысын тиімді өткізу бағытында ұйымдастырылған лагерь бүгін Zhanibekov University-де жалғасуда.
Бүгінгі шарада жас өрендер назарына университеттің физика-математика факультетінің әлеуеті мен жетістіктері, құрылымы таныстырылды. Оқу орнымыз туралы арнайы бейнеролик көрсетілді. Факультет деканы Альмира Ибашова мамандықтың қыр-сырына тоқталып, бүгінде физика, информатика, математика пәндеріне қатысты салалардың маңызын, оның ішінде компьютер бағдарламашысы, ЖИ, ITI мамандары сұранысқа ие екенін түсіндіріп, кәсіби бағыттады.
Университет Басқарма мүшесі-Стратегиялық даму және әлеуметтік мәселелер жөніндегі проректор Баршагүл Исабек оқу орнында студенттерге берілетін грант, жеңілдіктер туралы түсіндірді. Бүгінде университетімізде мемлекеттік гранттан бөлек, Шымкент қаласының әкімдігі берген тегін оқу мүмкіндігі арқылы 100-ден астам студент білім алуда. Әлеуметтік ерекшелігі бар талапкерлер мен шетелдік қандастарға да жеңілдіктер жетерлік.
Оқушылар үшін ең қызықты сәт робототехника бойынша өткізілген шеберлік сабақтары болды. Олар роботтарды құрастыру және бағдарламалау негіздерін үйренді. Факультетке қарасты қызықты зертханалар таныстырылды. Zhanibekov University-де жазғы оқу лагері 10 күндік үш ауысым аясында 30 күнге дейін жалғасады.