ГАЗИ УНИВЕРСИТЕТІНІҢ РЕКТОРЫМЕН МЕМОРАНДУМҒА ҚОЛ ҚОЙЫЛДЫ

26 September 2025, 16:26

Медиа Орталық

Zhanibekov University–не Түркияның Гази университетінен келген ресми делегация жұмысы жалғасуда. Бүгін қос тарап осы сапар аясында филиал жұмысын реттейтін екі жақты келісім шартқа қол қойды. Ресми кездесуге түркиялық серіктес әріптестермен бірге Өзбекәлі Жәнібеков атындағы ОҚПУ Басқарма төрағасы-ректор міндетін атқарушы Әлібек Нұртаев, сала проректорлары мен декандар, медиаорталық қызметкерлері қатысты.

Келісім шартта филиалға білімгер қабылдау тәртібі мен шарттары, олардың оқу үлгеріміне сай ауысу шарттары, филиалды басқару формасы, қаржыландыру тетіктері, инфрақұрылымын қамтамасыз ету, қызметкер алу және диплом беру сияқты негізгі мәселелер қамтылған. ҚР заңнамасына сай кейбір ережелер мен регламенттер қосымша дайындалуда.

— Осында болған екі күннің ішінде Сіздердің таза ықылас-пейілдеріңізді шынайы жүздеріңізден сезініп қуанып жатырмыз. Бұл ықылас біздің ортақ ісімізге оң әсерін тигізеді деп ойлаймын. Бүгінгі меморандум алдағы жетістіктерге бастайтын игі қадам болсын, —деді Гази университетінің ректоры, проф.др Угур Үнал.

Ал, Басқарма басшысы-ректор міндетін атқарушы Әлібек Нұрбайұлы екі ел Президентінің қолдауымен бастау алған ауқымды тірліктің болашағы зор болатынына сенім білдіріп,бұл бағыттағы жоспарлар тиянақталып жатқанын жеткізді.