Өзбекәлі Жәнібеков атындағы ОҚПУ Денешынықтыру және спорт факультетінің студенті Жасұлан Бердалы ҚР Бокс Федерациясының кубогін жеңіп алды. Былғары қолғап жеңімпаздарын анықтауға арналған ел чемпионаты Астана қаласында өтті. Айтулы додада Жасұлан 75 кг салмақта бақ сынасып, өзіне қарсылас шақ келтірмеді. Тағы бір қуанышты жаңалық, Жасұланға спорттың бокс түрінен спорт шебері атағы берілді.

Жеңімпаз бұл жарысқа Шымкент қаласында кіл мықтының арасынан іріктеліп қатысқанын айта кетейік. «Негізінде ел чемпионатында қарағандылықтар мен астаналықтар бізге мықты қарсылас болды. Сайыста соққы алып, қабағым жарылды. Әйтсе де айқын басымдықпен бәсім биік болып тұрған соң төрешілер мені жеңіске лайық деп тапты» дейді ол.

Жасұлан Нұрболұлы 18 жаста, Шымкент қаласында тұрады. Боксқа 10 жасынан бастап қатысатын ол 8 жыл ішінде тамаша жетістіктерді бағындырған. Атап айтқанда, 4 дүркін Қазақстан чемпионы, 2 дүркін Азия ойындарының финалисті, сондай-ақ, Шри Ланка Әлем кубогінің жеңімпазы және Черногория мемлекетінің спорт шебері атағын иеленген.