УНИВЕРСИТЕТТЕГІ КІТАП МЕРЕКЕСІ

14 Ақпан 2025, 18:44

Медиа Орталық

14-ақпан — Халықаралық кітап сыйлау күні.

Өзбекәлі Жәнібеков атындағы ОҚПУ-да атаулы күнге орай кітап фестивалі өтті. Рухани шараның мақсаты —кітапты насихаттау, жаңа авторлар мен шығармаларды таныстыру, әр адамды кітаптың құдіретіне үңілтіп, оқу мәдениетін арттыру.

Ұжымды кітап мерекесімен құттықтаған университет Басқарма төрағасы-ректор міндетін атқарушы Гүлжан Сүгірбаева «Бүгінгі жиыннан бір студенттің болса да бойында оқуға деген құлшыныс оянса, мақсаттың орындалғаны» дей келе, өз сыйлығын әріптестеріне тарту етті.

Басқарма мүшесі — Стратегиялық даму және әлеуметтік мәселелер жөніндегі проректор Баршагүл Исабек, барлық факультет декандары да оқу орнының кітапханасына, әріптестер мен жастарға қазақ қаламгерлерінің классикалық туындылары мен қазіргі сұраныстағы шығармаларды тарту етті.

Унивсерситет жастарының жақсы бастамасын қолдап келген «Аманат» партиясы жастар қанатының төрағасы Бекзат Төлебай, “Жастар ресурстық орталығы” КММ-і, жоғары техникалық және кәсіптік орта білім беру ұйымдарымен жұмыс жүргізу бөлімінің басшысы Бекарыс Бахадыр да студенттер кітапханасына кітап сыйлады.

«Балаларға базарлық» қайырымдылық шарасына қойылған алтын сандыққа жиналған кітаптар жетім, әлеуметтік аз қамтамасыз етілген отбасы балаларына таратылатын болады.

Фестиваль аясындағы кітап жәрмеңкесіне «Атамұра» корпорациясы, «Оқырман», «Отбасы хрестоматиясы», «Books Shymkent bestseller» кітап дүкендері қатысты. Сондай-ақ, «Оқы және өзгеге ұсын!» жобасы мен әдеби-танымдық кездесу, интеллектуалды ойын ұйымдастырылды.