Жаңа кешеннің ашылу салтанатына Мемлекет және қоғам қайраткері, экономика ғылымдарының докторы, профессор, ҚР ҰҒА академигі, университет Директорлар кеңесінің төрағасы Оразалы Сәбден, ҚР ҰҒА академигі, педагогика ғылымдарының докторы, профессор Оңалбай Аяшев, Басқарма төрағасы – ректор міндетін атқарушы Гүлжан Сүгірбаева және ұжым қатысып, лентасын қиды.

— Қазір әлемдік өркениетке бастайтын даңғыл жол — идея. Ал, идея адамға қайдан келеді, мықты денсаулық пен шыныққан ойдан туындайды. Сондықтан салауатты өмір салты мен спортқа жасалып жатқан жағдай құптарлық,- деді Оразалы Сәбден құттықтау сөзінде.

Бұл — университет оқытушылары мен студенттеріне пайдалану үшін беріліп жатқан екінші жабық кешен. Көлемі 22 метрді, биіктігі 13 метрді құрайды. Кіші футболға арналған алаңда ұлдар мен қыздарға арналған жуынатын және киім ауыстыратын бөлмелер бар. Кешен жылумен және жылы сумен қамтылған. Жаңа стадионға КСРО және Қазақстанның еңбек сіңірген спорт шебері Дәулет Тұрлыхановтың есімі берілді. Ашылу салтанатында университет оқытушы-професссорлар құрамы арасында өткізілген «Денсаулық» спартакиадасы мәреге жетті. Жеңімпаздар қаржылай сыйлықпен және алғыс хаттармен марапатталды.