Zhanibekov University–нің түлегі Әсем Русланқызы Британияның үздік университетінің бірінен магистратура бағдарламасына шақырту алды. Ол Өзбекәлі Жәнібеков атындағы ОҚПУ ағылшын тілі кафедрасының екі шет тілі мұғалімін даярлау білім беру бағдарламасының биылғы түлегі. Шақырту English Studies (Ағылшын тілін оқыту) бағдарламасы бойынша Ноттингем университетінен келіп отыр.

Әсем ағылшын тілін оқытуда қабілетті жас маман. Қазір түрлі деңгейдегі топтарға ағылшын тілін үйретіп, тәжірибе жинақтауда. Сонымен қатар, әртүрлі деңгейдегі ғылыми шараларға, атап айтқанда Integrity Project аясында іске асырылған «Баршаға қолжетімді білім» жобасына қатысты. Әсемнің таңдаған мамандығы еліміздегі ағылшын тілін оқыту сапасын арттыруға бағытталған. Ол үшін тіл - тек қатынас құралы ғана емес, мәдениетаралық келісім мен түсінісу, жеке тұлға болып дамудың маңызды кілті.

Айта кетелік, Ноттингем университеті (University of Nottingham), әлемнің үздік 100 жоғары оқу орнының бірі және Британияның Рассел Груп (Russell Group) жетекші зерттеу университеттерінің құрамына кіретін білім ордасы болып табылады. Біз осындай түлектеріміздің барына мақтанамыз!