АҚШ Бас консульдығының қолдауымен университетке ағылшын тілі маманы Эхаб Халаф (Ehab Khalaf) келді. Ол Ағылшын тілі кафедрасының студенттері мен магистранттарына дәріс оқып, тәжірибе бөліседі. Басқарма төрағасы – Ректор міндетін атқарушы Әлібек Нұртаев шетелдік оқытушыны қабылдап, ағылшын тілі қазіргі таңда жастардың әлемдік аренаға шығуының негізгі кілті екенін атап өтті. Кездесуге Басқарма мүшелері мен кафедра меңгерушісі қатысты.

Алматыдағы АҚШ Бас консульдығының өкілі Нұргүл Жаңабаева университет басшылығына ағылшын тілі оқытушысы Эхаб Халафтың тағылымдамасына көрсеткен қолдауы үшін ризашылығын білдірді. Эхаб Халаф – Сан-Франциско университетінің (University of San Francisco) «Ағылшын тілін өзге тіл иелеріне оқыту» (TESOL) мамандығы бойынша магистрі. Ол заманауи әдістер мен технологияларды тиімді кіріктіре отырып, студенттердің тілдік құзыреттілігін дамытуда мол тәжірибеге ие.

Айта кетейік, Эхаб Халаф – English Language Fellow (EL Fellow) бағдарламасы аясында шақырылған оқытушы. Бұл – АҚШ Мемлекеттік департаменті демеушілік ететін қоғамдық дипломатия саласындағы халықаралық бастама. Бағдарламаның басты мақсаты – өзара түсіністікті нығайту, ағылшын тілін оқытуды жетілдіру және білім алушылар мен жас ғалымдардың кәсіби біліктілігін арттыру. Бұл ынтымақтастық – университетіміз үшін халықаралық әріптестікті дамыту мен ағылшын тілін оқытудың сапасын арттырудағы нақты қадам болып табылады!