ЖАСТАР ЖӘНІБЕКОВТІ БІЛЕ МЕ?

23 Қыркүйек 2025, 11:52

Медиа Орталық

ZHANIBEKOV UNIVERSITY–де мемлекет және қоғам қайраткері, этнограф-ғалым Өзбекәлі Жәнібековтің өмірімен, еңбектерімен студенттерді таныстыру шарасы басталды. «Жәнібековтану» бағытында қолға алынған шара аясында білім алушыларға университеттің Өзбекәлі Жәнібеков орталығының басшысы Эльмира Оразбаева баяндама жасады. Жастар бұдан кейін орталық жұмысы мен Өзбекәлі Жәнібековтің ұлттық құндылықтар туралы айтқан бейнебаянын және қоғам қайраткері туралы түсірілген «Өнегелі өмір» атты деректі фильмді тамашалады.

Оқу орнымызға 2023 жылғы 22 маусым күні Республикалық ономастикалық комиссия шешімімен көрнекті мемлекет және қоғам қайраткері, этнограф-ғалым Өзбекәлі Жәнібековтің есімі берілді. Осы уақыттан бастап тұлғатану, «Жәнібековтану» бағытында ауқымды жұмыстар жүзеге асты. 2023 жылы Өзбекәлі Жәнібеков орталығы ашылып, университет ғимаратына ескерткіш тақта орнатылды.

«Өзбекәлі және мәдени майдан» кітабының авторы Санжар Керімбаймен кездесу, «Рух сардары» атты республикалық жас ақындар айтысы, «Ұлт қайраткері – ұрпақ жадында» атты Өзбекәлі Жәнібековтің ұрпақтарымен кездесу, дәстүрлі «Жәнібеков оқулары» атты халықаралық ғылыми-теориялық конференция, «Жәнібеков ізбасарлары» тақырыбында Өзбекәлі Жәнібековтің шәкірттерімен кездесу өткізілді.

Бүгінде студенттер мен көпшілік оқырман әлеуметтік желіде орталықтың парақшаларынан этнограф-ғалым туралы құнды мәліметтермен таныстырып, тұлғаның еңбектерін оқи алады.