Өзбекәлі Жәнібеков атындағы ОҚПУ Басқарма төрағасы-ректордың міндетін атқарушы Әлібек Нұртаев әлемдік додаларда ел намысын қолдан бермей жүрген қос спортшыны қабылдады.

Дене шынықтыру және спорт факультетінің 1 курс студенті Абыл Төлесінов жақында Біріккен Араб Әмірлігінде өткен Параазия ойындарында голбол спорт түрі бойынша І орынға ие болды. Спортшыны Қазақстан Республикасы Парламенті Мәжілісінің төрағасы Ерлан Қошанов қабылдап, Алғыс білдірген болатын.

Ал, Дене шынықтыру және спорт факультетінің 4 курс студенті Джохар Узаров Алматы қаласында өткен грек-рим күресінен Қазақстан чемпионатында 130 кг салмақ дәрежесінде белдесіп, ел чемпионы атанды. Ол биыл Вьетнамның Вунгтау қаласында грек-рим күресінен 23 жасқа дейінгі спортшылар арасында өткен Азия чемпионатында күміс жүлдегер атанған болатын. Сонымен қатар, 2024 жылы Париж қаласында өткен XXXIII жазғы Олимпиада ойындарының қатысушысы болып табылады.

Бұл жеңіс — студенттің табандылығы мен еңбегінің, сондай-ақ еліміздегі спортты дамыту жолындағы жүйелі жұмыстың айқын көрінісі. Спортшылардың жетістігі университет ұжымына зор мақтаныш. Университет басшысы жеңімпаздарды жарқын жеңістерімен құттықтай отырып, алдағы уақытта да биік белестерді бағындырып, ел абыройын асқақтата берулеріне тілектестік білдірді.