Бүгін университетте «Құрмет» және «Парасат» ордендерінің иегері, тіл жанашыры Оразкүл Асанғазиева ашық дәріс өтті. Ә. Ахабаев атындағы №317 аудиторияда өткен ашық дәріске оқытушы-профессорлар құрамы мен студенттер қатысты. «Отбасы берекесі» деп аталған дәрісте қазақ болудың қазығы неден басталды, адам боп қалу қағидаттары мен тұлға болып қалыптасу, тән мен жанға қажет нәрселер, отбасыдағы ер мен әйелдің рөлі, салт-дәстүр тақырыбы кең ауқымда қамтылды. Кездесуді Басқарма мүшесі-Стратегиялық даму және әлеуметтік істер жөніндегі проректор Баршагүл Исабек жүргізіп, спикердің өмірбаяны туралы кеңінен мағлұмат берді.

Еңбек жолын ұлағатты ұстаз болудан бастап, қайраткерлік деңгейге көтерілген О.Асанғазиева халыққа қызмет ету білімнен емес, мінезден екенін дәлелдеген тұлға. Бүгінде Астанадағы әрбір көше аты қайраткер қыздың қолтаңбасындай болып көрінеді. Шымкент жастарымен кездесуінде толқынысын жасыра алмаған ел анасы:

— Өзбекәлі Жәнібековке арналған музей орталығында «Талайлардың маңдайынан сипаған» деп жазылыпты. Ұлт жанашыры менің де маңдайымнан сипаған асыл азамат еді. Жалпы, адам болып қалу үшін, ұлтына қызмет ету үшін маған дейін кімдер болған, кімдердің ізін басам деп ойлау керек. Сендер өте бақытты шәкіртсіңдер! Адамның мықты болуы рухына байланысты. Өзбекәлі Жәнібеков кешегі кеңес одағының бұғауына басы сыймаған, рухы мықты, кейінгі ұрпақ үлгі алатындай тұлға. Айналайын жігіттер, қыздар, нағыз үлгіні басқадан іздеудің қажеті жоқ, Өз-ағаңа тартсаңдар жаман азамат болмайсыңдар! — деп жүрекжарды лебізін білдірді.

Кездесу соңында филология ғылымының докторы, профессор, әдебиет сыншысы, университет ректорының кеңесшісі Құлбек Ергөбек Оразкүл Асанғазиеваның ана тілін насихаттаудағы еңбегіне тоқталып, бүгінгі ашық дәріс үшін алғысын жеткізді. Оқу ордамыздың атынан қонаққа арнайы гүл шоғы мен естелік сыйлық табыс етілді.